LESONA 7 ME 6 - 12
O MEA ALOFA A LE AGAGA PAIA
AOAULI O LE SAPATI
Faitauga mo le Suesuega o le Vaiaso: Mat. 28:19,20; Mar. 16:15; Roma 12:6-8; 1 Kor. 12:7-25; Efeso
4:11.
MATUA TAULOTO: “A o mea faaleagaga, le au uso e, ou te loto ina ia iloa ai e outou.” E matalasi mea
alofa, a e tasi lava le Agaga ia” 1 Kor. 132:1,4)
Ua faailoa mai e le Feagaiga Fou o meaalofa faaleagaga o mea e foai mai e Keriso ae faasoa mai e le
Agaga Paia. E ui lava e tasi le Agaga, ae o meaalofa, pe o le auala e faailoa mai ai meaalofa a le Agaga e
lasi ma eseese. O nei meaalofa o le alofa tunoa(chrismata) ua mua’i tuuina mai i mau eseese e tolu” Roma
12:4-8, 1 Kor.12 -14, ma le Efeso 4:7-13.Atonu e oo lava i nei faataitaiga pe a tuufaatasia, e le lava ae ua
na o se faamalamalamaga o meaalofa faaleagaga. O nei meaalofa na folafolaina mai i le ekalesia ina ua
afio a’e Iesu i le lagi (Efe.4:8,11).
E leai se tasi i le ekalesia e ao ona manatu ua maua uma e ia meaalofa a le Agaga. E le tatau foi i tagata
uma ona manatu e tutusa le meaalofa poo meaalofa latou te maua. Ua faatusaina e le Feagaiga Fou le
ekalesia e faaalia ai meaalofa a le Agaga i le tino o le tagata: e eseese vaega tino, eseese galuega latou
te faia, peitai, e galulue uma lava faatasi mo le sini e tasi.
O le vaiaso nei o le a tatou vaai atu ai i nisi o nei meaalofa i le auala e faaalia ai i totonu o le ekalesia.
*Suesue le lesona o le vaiaso nei e sauni ai mo le Sapati, Me 13.
46.
-----------------------------------------------------------------------------------------------------------------------------------
ULUA’I ASO ME 7
O LE EKALESIA O LE TINO
FAITAU le 1 Korinito 12:7-25 ona tali lea o fesili o loo sosoo ai:
1. O le a le mafuaaga ua tuuina mai ai le Agaga i le ekalesia?
________________________________________________________
2. O le a le mea o loo foliga mai o le atugaluga o Paulo iinei?
________________________________________________________
3. O le a le galuega a le Agaga Paia e pei ona faaataina mai e Paulo?
________________________________________________________
4. O le a le manatu o tuuina mai e Paulo i lona faaaogaina o le tino o le tagata e fai ma faatusa
mo le galuega a le Agaga i le ekalesia?
__________________________________________________________
E auala mai i le Agaga ua fanaufouina ai i tatou ma avea ai ma itutino o le tino o Keriso. Tatou te auai i se
ekalesia i se nuu e auala i le sauniga o le papatisoga faatofu. Peitai, o tagata o le tino o Keriso, po o le
ekalesia, e le tutusa e pei lava ona le tutusa totoga o le tino. O se mea taua tele ona ia ‘aua ne’i tatou
taumafai e fau se tasi o se kopi tutusa o se tasi. E ao ona tatou olioli i le eseese o a tatou meaalofa.
E pei lava ona avea itutino uma ma vaega o le tino e tasi ae eseese galuega e fai, o le ekalesia ua tatou
auai e le atoatoa pe avea ma tino e aunoa ma ona tagata eseese uma. O le mafuaaga, e pei lava o le tino
o le tagata, tatou te manaomia uma vaega eseese; e manaomia e i tatou tagata eseese e mafai ona faia o
mea eseese.
A o le taimi foi lea e tasi, e le avea le eseese o se fevaevaeaiga. E pei lava o le faatusa ua tuuina mai e
Paulo, e ui lava ina eseese vaega o le tino, e foliga eseese, ma eseese galuega ae o loo galulue faatasi
uma lava mo le manuia o le fuafuaga e tasi. O galuega uma lava e faia mo le Matai e tagata eseese i
meaalofa eseese e ao ona fesootai atu i le tino atoa.
I mea ua oo ia te oe, o le a le mafuaaga silisili o feeseeseaiga i totonu o i tatou? Ona e eseese
ea i tatou ma eseese a tatou meaalofa, pe o se isi mea e ese mai ai? Afai o lea, O le a?
47.
----------------------------------------------------------------------------------------------------------------------------------
ASO GAFUA ME 8
O LE POTO MA LE MALAMALAMA
“Aua ua foaiina mai i le tasi le upu o le poto ma le malamalama, e tusa ma le Agaga e tasi; e i le
tasi le taofi tonu e le Agaga e tasi; e i le tasi o mea alofa e faamalolo a’i ma’i e le Agaga e tasi.”
1 Kor.12:8,9.
E taua tele ona o le mau o loo i luga o loo vaaia ai, o le “upu o le poto” ma le “upu o le malamalama” o
meaalofa a le Agaga. E masani ona tatou manatu o mea ia tatou te maua mai e ala i suesuega, galuega
ma mea e tutupu i le olaga. Peitai, o ia manatu e lua e le feteena’i. O nisi o tagata e mafai ona faitau ma
suesue ma ola i le olaga ae fo’i mai e aunoa ma se “malamalama” moni po o le “poto” e pei ona
faamatalaina mai e le Tusi Paia o ia mea.(Faataoto 1:7,9,10). O le mea lea, e manaomia e i tatou le
Agaga Paia e foa’i mai ia i tatou le malamalama ma le poto, e pei ona faamatalaina mai e le Tusi Paia o ia
upu.
Ua faapefea ona fesoasoani mai ia i tatou o le 2 Timoteo 3:7 ia malamalama ai i le manaoga mo le
Agaga Paia mo le poto ma le malamalama faale Tusi Paia?
___________________________________________________________
O se tulaga faanoanoa ae moni, ona i totonu o tala tuufaasolo, sa iai nisi o tagata suesue o le Tusi Paia
sa le talitonu i upu moni o le Tusi Paia. Atonu o nisi o i latou e atamamai ma lauiloa i le poto faapitoa i
gagana ma atonu e silisili atu foi lo latou iloa o tala tuufaasolo o le Tusi Paia. Peitai, o le poto faaleagaga
ma le malamalama e faatatau i le Atua sa iai i totonu o ia mau sa matua le maua e i latou. Se leiloa ina tele!
FAITAU le 1 Korinito 2:5-7. O le a le poto o loo tautalagia iinei? Aisea tatou te manaomia ai le
Agaga ina ia malamalama i ai?
___________________________________________________________
___________________________________________________________
Vaai i le faatusatusaga na tuuina e Paulo i ituaiga eseesega o malamalama ma le poto. Maitau foi, le auala
na ia faatusatusaina ai le eseeseega o le poto o le lalolagi ma le “mana” o le Atua. E taua tele lea itu, aua
o le poto o le Atua e liua ai le olaga. Na te aumaia le mana ma le liuga i o tatou olaga; e le na o ni mea
moni ma ni manatu fai. O le mana e liua ai le olaga ua na o le Agaga Paia o loo galue i totonu o i tatou e
auala mai ai….
48.
----------------------------------------------------------------------------------------------------------------------------------
ASO LUA ME 9
VAVEGA MA FAAMALOLOGA
E tumau pea i le ekalesia meaalofa a le Agaga seia oo i le toe afio mai o Iesu. E aofia ai le meaalofa o
faamalologa, faapea foi ma le meaalofa o le faia o vavega (1 Kor.12:8-10). Peitai, tatou te manatu e le o
se mea fetaui mo se tagata kerisiano ona teena fesoasoani mai foma’i, ae manatu e faamaloloina e le Atua
se tagata ma’i i se vavega e aunoa ma lona faia o se mea e togafitia ai lea tulaga. E le soona faaaogaina
e le Atua vavega pe faaaoga vale. “O le mea e mafai e le malosi o le tagata ona fai, e le poloaiina le mana
faalelagi na te faia.” Elena Uaita, The Desire of Ages, p. 535.
O le Korinito 12:10 o loo tautala e faatatau “i galuega o vavega.” E faapefea ona tatou
malamalama i le uiga o lea mea?
___________________________________________________________
___________________________________________________________
E faapea se upu na faia e se tasi, o Vavega, e ala ona manatu o ni vavega ona o ni mea e seāseā tutupu.
Mo se faataitaiga, afai na’o le faatasi lava ona oso a’e le la i le afe tausaga, o i latou e vaai iai latou te
talitonu ua latou molimau se vavega. Talu ai tatou te vaai i le la oso i taimi uma, ua tatou manatu ai ua na
o se mea masani – tusa lava po o le a lona “ofoofogia.” Manatunatu i se tagata e le’i vaai muamua i se
telefoni feavea’i(cell phone) i lona soifuaga: O le a le ofoofogia faavavega tele i le manatu o lea tagata i
lona faalogo atu i se leo mai totonu o lenei tama’i pusa!
O a nisi mea “masani” i lalo ifo o isi tulaga, e ono mafai ona manatu ai o se “vavega”?. O le a se
mea e mafai ona tatou aoaoina mai i nei mea e fesoasoani ia i tatou e malamalama lelei ai i
natura o vavega?
___________________________________________________________
___________________________________________________________
Ao lē masalomia le avea o “Vavega” ma auala e mafai ai ona faamalosia lo tatou faatuatua, o se
faatuatua e faalagolago atu i ia mea e le o se faatuatua moni (Luka 16:31). Atonu o nisi o i tatou ua vaai i
ni mea e mafai ona manatu o ni “vavega.” Atonu o nisi, o le vavega silisili o le suiga o o latou olaga na faia
e le mana o le Atua o loo galue i totonu ia i latou. E ui lava ina mafai e le Agaga Paia, i Lona poto faalelagi,
ona faia o vavega (vaai i le Mat.12:28) i soo se taimi e finagalo ai, o le faia o vavega e le o se faamaoniga
o loo galue le Atua. E le faapea foi o le leai o ni “vavega” o le faamaoniga e le o faatasi le Atua ia i tatou.
O a ni vavega ua faia e le Atua i lou olaga? Sauni e faasoa atu i lau vasega au tali.
49.
----------------------------------------------------------------------------------------------------------------------------------
ASO LULU ME 10
VALOAGA MA LE PULEGA
Faitau le Roma 12:6-8; 1 Korinito 12:10,28: ma le Efeso 4:11. O le a le meaalofa e tasi o loo ta’ua i ia
mau ta’itasi?
O le perofeta o le fofoga fetalai lea mo le Atua. E oo lava i le taimi ina ua mavae ona avea Isaraelu
anamua ma malo e iai le tupu, o le perofeta lava na te maua feau ma faatonuga mai le Atua. O ia na te
tuuina atu ia feau i le tupu. O le mea lea, o le perofeta, o le fofoga fetalai a le Atua i le nuu e pei o le
faifeau o le fofoga fetalai a tagata i le Atua. E le mua’i iloa le aano o le feau peitai so o se feau lava e
finagalo le Atua e tuuina mai i Ona tagata i soo se taimi faapitoa, pe faatatau i le taimi ua te’a, taimi nei, pe
o le taimi lumanai. E manaomia e le ekalesia a le Atua i aso nei, e pei foi o taimi ua alu, faatonuga mai le
Atua. O le sui autu e tuuina mai ai nei faatonuga o le perofeta.
E faaopoopo atu i perofeta o e maua faatonuga mai le Atua, o le a le mea e manaomia i totonu o
le ekalesia ina ia tuuina atu le fuafuaga faalelagi i se pulega maopoopo? 1 Kor. 12:28.
O le Rivised Standard Version na te faaaogaina “o e pule”(administrators) ae le o le “malo”(goverments).
E ui lava o le galuega o le tala lelei o le galuega a le Atua, ae o nisi o sui tagata e tatau ona ta’ita’ia i lalo
ifo o le taitaiga a le Atua.
O a nisi o mea tutupu i le ekalesia a le au aposetolo e faailoa mai ai e galue le Atua e ala atu i
sui tofia i Lana ekalesia faatulagaina lelei? Gal. 9:10-17, 13:1-3.
O le tulaga i le tuueseeseina o Paulo ma Panapa e le Agaga Paia i se galuega faapitoa e faailoa manino
mai ai e galue le Atua e ala atu i sui tofia i totonu o Lana ekalesia faavaeina. I tausaga ua te’a, ina ua mua’
i faailoa atu le finagalo o le Atua mo Paulo e le Faaola lava ia. na faafesootai atu Paulo i le taimi lava lea i
tagata o le ekalesia fou faatoa faavae i Tamaseko… I le taimi nei, ina ua oo i le taimi e tatau ona
faataunuu atoatoa ai le poloaiga faalelagi na tuuina mai i lea taimi, o le Agaga Paia lava lea, na tuuina atu
le molimau e faatatau ia Pauulo o se ipu filifilia e momoli le tala lelei i nuu ese, na tuuina atu i luga o le
ekalesia le galuega o le faauuina o ia ma lona soa galulue.” Acts of Apostles, pp. 162,163.
Aisea e tuuina atu ai e le Atua faatonuga o lana galuega i le lalolagi i Lana ekalesia nai lo le
tuuina atu i tagata taitoatasi?
50
------------------------------------------------------------------------------------------------------------------------------------
ASO TOFI ME 11
O GAGANA (TOE SUESUEINA)
O mealofa o gagana e pei foi o valoaga ma vavega, e iai lona tulaga taufaasese faafoliga. O le ulua’i
meaalofa i le aso Penetekoso o gagana moni lava sa tautala ai tagata. O le tautala i ni leo e ese mai
gagana a tagata o se taufaasese faafoliga o le mea moni.” Handbook of SDA Theology, vol. 12 ,p.619.
E pei lava ona tatou vaaia i le ulua’i suesuega, e foliga mai e manino lava o “gagana” o loo ta’ua iinei e
faasino i gagana a isi tagata, aua o le auala lava lea na faaalia mai ai le meaalofa i le aso Penetekoso ma
isi taimi na sosoo ai e pei ona tusia(Galuega 2:10:44-46, 11:15, 19:6)
Aisea e ao ai ona taua tele i le uluai ekalesia le meaalofa o gagana? Mat 28:19,20; Mar.16:15;
Roma 1:8.
___________________________________________________________
___________________________________________________________
Sa iai i le ulua’i ekalesia le manaoga tele mo le meaalofa o gagana, pe o le agavaa i gagana eseese. E
tatau ona tuuina atu le tala lelei i le lalolagi a o le toatele o ulua’i kerisiano e le’i maua e i latou le tomai i
gagana a isi atunuu.
O ai e sili atu ona tautala soo i isi gagana nai lo se tasi? 1 Kor.14:18. O le a lou manatu o le a le
uiga o lea faamatalaga?
___________________________________________________________
___________________________________________________________
I lana talaiga i tagata faapaupau, e masani lava o se mea tatau ia Paulo i taimi uma ona faaaoga se
gagana e ese mai nai lo lana gagana aramaika masani – o le gagana masani lea a tagata Iutaia i le taimi o
Iesu ma le au aposetolo. O Korinito o se aai tele o taulaga o vaa ma fefaatauaiga ma e maua ai tagata
mai vaega e tele o le malo o Roma. E foliga mai o nisi o le ekalesia kerisiano i Korinito sa mitamita i le
faaaogaina o gagana e le malamalama iai nisi o tagata ekalesia. Sa fautuaina i latou e Paulo ina ia ‘aua
ne’i faia faapea, vagana ua iai se tasi e faamatala upu, talu ai e leai se tasi e faamanuiaina ai o le
faapotopotoga vagana lē o loo tautala.(vaai i le 1 Kor.14:4).
O a nisi o ituaiga o taufaaseseega na feagai ma oe, pe ua e iloa? O le a se mea e mafai ona e
aoaoina mai ia i latou e mafai ona fesoasoani e puipuia oe mai isi taufaasesega faaleagaga e
ono fetaia’i ma oe?
51.
-----------------------------------------------------------------------------------------------------------------------------------
ASO FARAILE ME 12
SUESUEGA FAAOPOOPO: Elena Uaita, Testimonies for the Church, vol. 2,pp 33-35; vol. 5, pp. 236-238;
Christ Object Lessons, “Hidden Treasure:, pp 112-114; The Great Controversy, pp. 625; The Acts of the
Apostle , pp. 160-165; Counsels to Parents, Teachers, and Student pp. 243-245.
“Sa a’oa’o atu Paulo o meaalofa – e aofia ai valoaga, a’oa’o, aposetolo, evagelia, ma le tautala i gagana,
ma le faia o vavega—e tatau ona faaaogaina e soo se tagata kersiano lava. Mai le tusi lenei i tagata
Korinito e manino lava sa iai nisi sa latou faaaogaina sese meaalofa, ae maise lava le tautala i gagana
eseese.
“A o faamamafaina i nisi nofoaga le taua tele o le tautala i gagana eseese, ae ua faamanino lelei mai i le
Feagaiga Fou o isi foi meaalofa e sili le taua mo le solosolo lelei o le ekalesia. Ua ta’ua mai e Paulo le
meaalofa o valoaga e silisili atu le manaomia. O le mea lea, o le vaega tele o lenei tala o loo faaaluina i le
talanoaina o lenei meaalofa. Handbook of SDA Theology, vol. 12, p. 610.
Sa faataapeapeina tagata Iutaia toetoe lava i malo uma, ma sa tautala i latou i gagana eseese…O le
eseese o gagana sa avea ma to’atuga tele i le galuega a auauna a le Atua i le tala’i atu o aoaoga a Keriso
i tuluiga o le lalolagi. Ona ua faaatoatoaina e le Atua le mea sa le mafai e le au aposetolo i se auala
faavavega, o le manatu o tagata o se faamaoniga atoatoa lea o le molimau a i latou nei mo Keriso.” Elena
Uaita, The story of Redemption, pp.242, 243.
FESILI MO FELAFOLAFOAIGA
1. Talanoa le vasega i au tali i le fesili mulimuli o le Aso Lua. O le a lou malamalamaaga i le a
mea e ta’ua o le “vavega.” O le a le mea e faia e le vavega i lou faatuatua? O le a se uiga
matautia o loo iai i le faalagolago atoa atu i vavega mo lou faatuatua?
2. Talanoa le vasega e faatatau i le tulaga ma le galuega a Elena Uaita ma le meaalofa o
valoaga. Ua faapefea i le faailoa mai o lenei meaalofa ona fesoasoani ia i tatou i lona uiga
lautele i le tulaga e ao ona iai mo le ekalesia?
3. Talanoa e faatatau i meaalofa faaleagaga a tagata o le vasega. O le a se mea e mafai ona e
faia mo le faamalosia o le tasi i le tasi mo ia meaalofa, atoa ma le fesoasoani atu o le tasi i le tasi
mo le faaaogaina lelei o ia meaalofa?
52.
