LESONA 13 IUNI 17 -23
O LE AGAGA PAIA I ONA
ASO O LE I’UGA
AOAULI O LE SAPATI
Faitauga mo le Suesuega o le Vaiaso: Ioelu 2:28,29; Ioane 1:9; Galuega 2:14-24, Gal. 3:19-20;
Iakopo 5:7; Faaal. 14:6-16; 18:1-5.
E auala i le faaali atu ma le lafoa’i o agasala, e auala i talosaga naunautai ma le faapaiaina o i latou i le
Atua, na saunia ai le ulua’i au soo mo le liligiina ifo o le Agaga Paia i le aso Penetekoso. O le galuega lava
lea e tasi, ae i le tulaga sili atu, e tatau ona faia nei. Ona tagi atu lea o le tagata mo le faamanuiaga, ma
faatalitali mo le Alii e faaatoatoaina le galuega mo ia. O le Atua lava na amatain le galuega, o Ia foi na te
faaumaina Lana galuega, i le faaatoatoaina o le tagata ia Iesu Keriso. Peitai, e le tatau ona iai se
faatamala i le alofa tunoa e faatusaina i le uaga muamua. Ua na o i latou lava o loo ola e tusa ai ma le
malamalama ua latou maua o le a latou maua le malamalama sili atu.” Elena Uaita, Advent Reiew and
Saggath Herald, Ma. 2 1897.
Se feau ina taua i ia upu a o tatou faaiuina le suesuega o lenei kuata, i le taula’i atu nei o le vaai i le
Agaga Paia i aso o le iuga. O le a tatou vaai i le mea o le a faia e le Agaga Paia ina ia mafai ai ona saunia
tagata e tala’i atu lenei tala lelei ina ia mafai ai ona tutu atu i faigata o aso e gata ai.
Suesue le lesona o le vaiaso nei e sauni ai mo le Sapati, Iuni 24.
88.
--------------------------------------------------------------------------------------------------------------------------------
ULUA’I ASO IUNI 18
O LE AGAGA I ONA ASO E GATA AI
“Mulimuli ane, e iu ina ou liligi ifo ai lo’u Agaga i luga i tagata uma; ona perofeta ai lea o outou
atalii ma o outou afafine, e fai miti o outou toeaiina, e iloa faaaliga e o outou taulelea. Ou te
liligi ifo foi lo’u Agaga i auauna ma auauna fafine, i ia ona aso.” Ioelu 2:28,29
SUESUE le fuaiupu o loo i luga, faatasi ai ma le Galuega 2:14-24. O le a se feau e tatau ia i tatou
o loo e vaai iai iinei? O fea ni auala, pe afai e iai, ua vaaia e i tatou i ona aso nei ua
faataunuuina ai lenei valoaga?
___________________________________________________________
___________________________________________________________
___________________________________________________________
O upu a Ioelu iinei o nisi ia o upu aupito sili ona faagaeetia loto i totonu o le Tusi Paia atoa. O loo faasino
atu i se taimi o le a matua liligiina ifo ai i se auala lauiloa le Agga Paia e pei ona liligiina ifo i le aso
Penetekoso. Peitai, o lenei liligiina ifo e le o se mea e tupu fua, ae o se vaega o le fuafuaga e tasi: o le
aumaia lea o tagata i le malamalama e faaolaina ai o Iesu Keriso. E matua manino faapitoa lava lenei
manatu i le lauga a Peteru i le aso penetekoso, lea ina ua uma ona siitia mai o ia upu mai le Ioelu, sa
amata loa e ia ona lauga atu e faatatau ia Iesu Keriso (Ioelu 2:22-24). Ua faapea mai foi le Ioelu 2:28, e
liligi atu e Ia Lona Agaga i “luga o tagata uma.” E le faapea o tagata uma o le a tali atu i le agaga gaua’i
ma le loto maulalo e manaomia mo le maua o le faamanuiaga a le Agaga. E ala atu i le galuega a le
Agaga Paia, o le a mafai ai e le Alii ona pa’i atu i loto o agaga uma i le lagona. Ua fai mai le Tusi Paia: O
le malamalama moni (Iesu) na te faamalamalamaina ua afio mai i le lalolagi”(Ioane 1:9); O le itu e
faanoanoa ai, “e le o tagata uma” e tali atu e pei ona finagalo ai le Atua.
O le tala lelei, o i latou uma e tali atu, o i latou uma o e gaua’i atu, latou te maua le folafolaga o le ola e
faavavau ia Keriso.
O a ni faailoga vaaia ua e iloa i le mana tosina o le Agaga Paia i luga o i latou e le o ni tagata
kerisiano? O le a se mea e mafai ona tatou faia, o ni tagata kerisiano, e galulue faatasi ai ma le
Agaga ina ia mafai ona fesoasoani atu i tagata ia iloa Iesu i le malamalama atoatoa?
89.
----------------------------------------------------------------------------------------------------------------------------------
ASO GAFUA IUNI 19
O LE PENETEKOSO MA ASO E GATA AI
E pei ona tatou vaaia ananafi, o loo tautala Ioelu i uaga mamafa o le liligiina ifo o le Agaga o le Atua i luga
o Ona tagata, i le vaaia e taulelea o faaaliga, a o toeaiina e fai a latou miti, ma atalii ma afafine e perofeta
ane (Ioelu 2:28,29). Ua ia tuuina mai foi le taimi e faataunuuina ai ia mea. O le a iai mea e tutupu i le lagi i
le faapogisaina o le la ma le gase toto o le masina. O faigata i le lalolagi ua faamatalaina mai i ni uiga lilo
e pei o le “toto, ma le afi, ma le asu faaniutu” (f. 31).
Na vaai atu Peteru faatasi ma isi ulua’i tagata talitonu kersisino i le afio mai o Iesu o aso o le i’uga (1 Kor.
190:11), epe. 1:2, 9:26, 1 Pet. 1:20), ma faatatau le valoaga a Ioelu i le mea na tupu i le Penetekoso
(Gal. 2:16-21), i le faafesoota’i atu o le meaalofa o valoaga i le meaalofa o gagana.
FAITAU le Ioelu 2:23, lea e muamua mai i ana upu e faatatau i le liligiina ifo o le Agaga Paia. O le a
se gagana faatusa na ia faaaogaina?
___________________________________________________________
___________________________________________________________
O le valoaga a Ioelu i le oo mai o le mea alofa faavaloaga ua tuuina mai i le siosiomaga o le uaga
muamua ma le uaga mulimuli (Ioelu 2:23-32). O le uaga e totogo a’e ai i le taimi e toulu ai lau o laau, e
mafai ai e le fatu ona totogo a’e ma maua’a, e ta’ua o le uaga muamua. O le timu i le taimi o le tau
tuputupu, e matua ai le fatu ma sauni e seleina, e ta’ua o le uaga mulimuli. O lenei mea e tupu i galuega
faafaato’aga i Palesetina o le faatusa o le faafouga faaleagaga e tuuina mai e le Atua i Ona tagata e ala i
le Agaga Paia (Hosea 6:3). Na talitonu a’ia’i Peteru na ola o ia i aso o le i’uga, i le maua o le uaga
muamua. O le uaga mulimuli o le a oo mai i luga o tagata o le Atua i aso o le i’uga.
E faapefea ona tatou malamalama i le uiga o le “uaga mulimuli”?
E latalata atu i le faaiuga o le seleselega o le lalolagi, ua folafolaina mai le liligiina ifo o le alofa tunoa
faaleagaga e saunia ai le ekalesia mo le afio mai o le Atalii ole tagata. O lenei liligina ifo o le Agaga ua
faatusaina i le totō ifo o le uaga mulimuli.” Acts of Apostles, p. 55.
Se a se mea ua oo ia te oe i le “uaga muamua”? Aisea e taua tele ai le maua o le uaga muamua
ina ia saunia ai e talia le “uaga mulimuli”?
90.
--------------------------------------------------------------------------------------------------------------------------------
ASO LUA IUNI 20
O LE UAGA MULIMULI
“O lenei, le au uso e, onosai ia seia oo i le afio mai o le Alii, Faauta, e faatali lē galue fanua i le
fua aoga o le eleele, e faatalitali i ai, seia maua le uaga muamua ma lē mulimuli.” Iakopo 5:7.
I le siosiomaga o lea ua uma ona tatou faitauina, e faapefea ona tatou malamalama i upu a
Iakopo oloo i luga? Ua faapefea ona faailoa ai ia i tatou e lenei mau lo tatou faalagolago atu
atoatoa i luga o se puna e i fafo atu o i tatou mo le malosi faaleagaga?
___________________________________________________________
___________________________________________________________
E pei ona tatou vaai iai ananafi, na faia e Ioelu lana valoaga i le siosiomaga o “uaga.” O le upu timu(uaga)
uaga muamua, ma le uaga mulimuli na nono mai e tusitala Eperu i le siosiomaga o tau(seasons)
faafaatoaga. O le uaga muamua, O le ulua’i uaga, po o le uaga muamua e pa’u mai i le masina lona fitu,
e masani lava i le faato’a uma o le Tausamiga o faleapitaga. E fetaui lelei lea ma la tatou tau toulu po
o Setema- Oketopa. Mo tagata Isaraelu, o le tau lea mo le suaina o le fanua ma le luluina o Karite ma le
saito. O le uaga mulimuli e pa’u mai a o lumanai le seleina o le fua ia Mati ma le amataga o Aperila. O le
uaga lenei e mafai ai e le fatu ona atoatoa ma matua mo le seleselega.
O nei upu ua faaaogaina e tusitala o le Tusi paia e faatusa iai taimi taua o le faafouga faaleagaga e
fesootai atu ma le talaiina o le tala lelei. O le manatu taua, ina ia matua le seleselega mo le seleina, e
manaomia uma uaga e lua.
VAAI i nai fuaitau o loo i lalo: E faapefea ona latou fesoasoani mai ia i tatou ina ia malamalama
ai i le uiga taua o le faatusa i uaga, ae maise lava i le siosiomaga o la tatou galuega o se
ekalesia? Mataio 9:37, 13:30, Faaal. 14:15.
E pei ona mua’i ta’ua, o le mafuaaga o le uaga mulimuli faaleagaga e tai tutusa lava ma le uaga masani:
e saunia ai le seleselega mo le seleina.Se faatusa ina malosi tele e faatatau i le galuega a le Agaga Paia
e faia i totonu o Ona tagata, aua o i latou e faaaogaina e le Atua e tala’i atu le feau o le tala lelei i le
lalolagi. “A o faapelepleina e i tatou le faamanuiaga o le uaga muamua, e le tatau i le tasi itu, ona lilo i la
tatou vaai le mea moni , a aunoa ma le uaga mulimuli, e faaatoatoa ma matua ai le fatu, o le a le saunia le
seleselega mo le sele saito, ma o le a maumau le galuega a le lulu saito. E manaomia le alofa tunoa i le
amataga, manaomia le alofa tunoa i laasaga uma aga’i i luma, ma ua na o le alofa tunoa foi e mafai ona
faauma ai le galuega. The Faith to Live By, p. 334.
91.
----------------------------------------------------------------------------------------------------------------------------
ASO LULU IUNI 21
“O lenei, ina salamo ia outou ma outou liliu, ina ia soloiesea a outou agasala, ina ia oo mai ai o
tausaga e filemu ai mai luma o le Alii; ina ia auina mai foi e ia le na muai talaiina ia te outou, o
Iesu Keriso lea.” Galuega 3:19,20.
Vaai i le faamatalaga faigata ona talitonu na faia e Peteru. Matau lelei le latalata tele na ia fesoota’ia ai le
salamo ma le liuga ma “tausaga o le filemu.” I nisi upu, o le mea o loo tupu iinei i o tatou loto e fesootai atu
ma le liligina ifo o le Agaga Paia. E tatau lava ina ia ‘aua nei galo ia i tatou le moni o lenei noataga felata’i i
le va o le lagi ma le lalolagi.
O a ni mea tetele se tolu e tutupu o aso o le iuga o loo tautala aga’i iai Peteru i le mau o loo i
luga. O le a le mea o loo ia fai mai ai e faaalia ai o nei aso, o aso moni lava o le i’uga?
___________________________________________________________
___________________________________________________________
O le faamatalaga a Peteru o loo iai se elemeni mautinoa mo se taimi. I lalo ifo o le agaga Paia, o loo
tautala ai Peteru i mea tetele o le a tutupu i le lalolagi i ona aso e gata ai – Le liligiina ifo tele o le Agaga
Paia ma le soloiesea mulimuli ane o agasala a tagata amiotonu – lea o loo noatia faatasi atu i le taualuga
lona tolu o le mea e tupu, o le afio faalua mai lea o Keriso.
FAITAU le Faaaliga 14:6-16.Aisea tatou te iloa ai o mea tutupu nei e muamua itiiti mai i le afio
faalua mai? E faapefea ona tatou iloa i nei fuaiupu faailoga vaaia o le liligiina ifo ma le mana
tele o le Agaga Paia?
___________________________________________________________
___________________________________________________________
E ui lava e auala i nei mau ua tatou vaai ai i faailoga o le galue o le Agaga Paia e ala atu i Ona tagata, e
le gata ina saunia i latou e tala’i atu le tala lelei e faavavau”(f. 6)i le lalolagi, e le gata ina lapataina isi nai
le ifo atu i le “manu feai”(f. 9), ae aofia ai foi ma le saunia o i latou e tutu atu o i latou o e “tausi i poloaiga
a le Atua, ma le faatuatua ia Iesu”(f. 12).Afai e le o le galuega lea a le Agaga Paia i totonu o i tatou, e leai
se isi mea e mafai.
A o e vaai i le ekalesia i aso nei, aisea e alia’i mai ai tatou te manaomia se liligiina ifo o le Agaga
Paia i le mana ina ia mafai ai e i tatou ona faia lana galuega? Aisea e manino ai e te manaomia
foi?
92.
-------------------------------------------------------------------------------------------------------------------------------
ASO TOFI IUNI 22
O LE ALAGA LEO TELE
E ui ina tatou vaaia i le Penetekoso se liligiina ifo i le mana tele o le Agaga Paia, ae ua tatou talitonu o aso
e gata ai tatou te vaaia ai se mea e sili atu ona malosi. E manaomia e le lalolagi uma le iloa o le upu moni
e faatatau i le Alii o Iesu i le siosiomaga o agelu e toatolu o le Faaaliga 14, e tetee atu i aoaoga sese a
Papelonia e ta’ita’i atu ai i le faailoga o le manu feai. Ma e faigofie lava, e leai se tasi, ua na’o le Ekalesia
Aso Fitu o le Toe Afio Mai, o loo tala’iina atu lenei feau uiga ese? .Peitai, o ai ni tagata o le Toe Afio Mai
e vaai atu i luma i lenei galuega tele, ma talitonu, tatou te mafai ona fai e aunoa ma le liligina ifo o le
Agaga Paia i le mana tele? O le mea lea, tatou te talitonu ai i le taimi lava o le i’uga o le Agaga Paia na te
aumaia Ana meaalofa i le ekalesia i se auala ofoofogia. E tatau lava ia te Ia; aua a leai, o mea e tutupu i
le taimi mulimuli, e pei ona faaataina mai i valoaga, o le a le mafai ona faataunuuina.
FAITAU le Faaaliga 18:1-5. O a ni faailoga vaaia tatou te maua i nei fuaiupu e faailoa mai ai mea o
le a tupu i le liligiina ifo lenei o le Agaga Paia i luga o le ekalesia?
O lenei “alaga leo tele” o le a oo atu i itu uma, a o faaaogaina e le Alii Lana ekalesia e valaau ese ona
tagata uma mai Papelonia le tapuaiga sese ma pulega faalemalo ua auaumea faatasi e avea ma malo
saua i ona aso e gata ai. O lenei alaga e aofia ai le olega mulimuli e sola ese mai mala mulimuli (Faaal.
15) ae saili le lafitaga i lalo ifo o aao o Iesu, le Faaola. I lenei, taua mulimuli i le va o e mulimuli i le Tamai
Mamoe ma e mulimuli i le manu feai, o le a faamamaluina Keriso e ala i le mana o le Penetekoso o le a
liligiina ifo i luga o le lalolagi (Faal.18:1) e ala i le Agaga Paia. I le taimi lenei, o le a tatou vaaia ai le
seleselega ua aoina mai e ala i le uaga mulimuli.
I lea auala, i toe aso lava o le iuga, o le a faataunuuina ai fua o le Satauro ma le galuega o le Satauro. O
le a faatutuina mai tagata oti uma ia Keriso(1 Tes.4:16), faatasi ai ma i latou o loo ola pea, o le a aveina
ese i latou mai lenei lalolagi agasala, e faavavau (f. 17). O le mea lea, i le i’uga, o le a tatou vaaia ai le
taualuga o le faaaliga o le Agga Paia, a o galue o Ia i loto, e le gata ia te i latou ua valaaulia e tala’i atu
lenei feau ae faapea foi i loto o i latou e talia o ia ma tutu atu faatasi ma i tatou – e le gata i aso e gata ai
e tetee atu i ‘au a Papelonia – ae faapea foi i luga o le sami tioata i le lagi( Faal. 15:1-5).
Se meaalofa ina ofoofogia ua tuuina mai ia i tatou i le Agaga Paia!
Tusi i lalo se tatalo e faafetai atu ai i le Alii mo le Agaga Paia ma ole atu mo le sauniuniga e
manaomia i lou lava loto ina ia e tumau i le faamaoni, e le gata i faigata o aso e gata ai, ae o le
taimi nei.
93
-------------------------------------------------------------------------------------------------------------------------------------
ASO FARAILE IUNI 23
SUESUEGA FAAOPOOPO:
Elena Uaita, Education, pp. 35-38; Prohpets and Kings, pp. 238-243; The Acts of the Apostle, pp. 578,
593-595; Testimonies for the Church, vol. 8, pp 21-23; Testimonies to the Minister and Gospel Workers,
pp 64-68, 506-509.
“E le tatau ona tatou faatalitali mo le uaga mulimuli. E oo mai lava i luga o tagata uma o e latou te iloa ma
talia le sau ma matāua o le alofa tunoa e to’ulu mai i o tatou luga. Pe a tatou aoina mai vaega taitasi o le
malamalama, pe a taua i o tatou loto le alofa tunoa o le Atua, o Le e alofa mai ia i tatou ma fiafia pe a
tatou faalagolago atu ia te ia, o le taimi lea o le a faataunuuina ai folafolaga uma lava.” Elena Uaita,
Comments, The SDA Bible Commentary, vol. 7, p. 984.
O mafutaga a le ekalesia, pe o fono faatasi, pe o faapotopotoga o le ekalesia i aiga, ma taimi uma lava o
loo faia ai se galuega mo agaga, o avanoa tofia ia a le Atua mo le tuuina atu o le uaga muamua po o le
uaga mulimuli.” Elena Uaita, Testimonies to Ministers and Gospel Workers, p 508.
FESILI MO FELAFOLAFOAIGA:
1. I le avea o se vasega, talanoa i mea o tutupu i le lalolagi ma mea tutupu e aiga atu i lo
tatou malamalamaaga o mea tutupu o aso e gata ai. E ui lava ina e le tatau ona tatou soona
mateletele, o a ni faailoga ua tatou vaaia e faasino atu i faigata o aso e gata ai? O le a se mea e
mafai ona tatou faia o se vasega e fesoasoani atu ai i lau ekalesia e malamalama i le taimi o loo
tatou ola ai ma le manaoga e sauniuni e talia le uaga mulimuli?
2. Manatunatu le vasega e faatatau i le galuega a le Agaga Paia ona fesili lea i le fesili
lenei: I meaalofa uma lava a le Agaga Paia ma galuega uma ua ia faia mo le ekalesia, o le a le
mea e tasi e te talitonu e silisili ona manaomia e lau ekalesia? Felafolafoa’i iai.
3. O le a se mea ua e aoaoina mai i le suesuega o lenei kuata ua silisili ona aafia ai lou
olaga? O le a se mea ua e aoaoina e te lagona ai le manaoga o se suiga ia te oe lava? Afai o
lenei suesuega e le o aafia ai se mea e te manatu e ao ona suesueina, aisea e te le suesue ai
loa oe i le mea e te manao ina ia suesueina?
94.
