Lesona 1 Mati 25 - 31
LE ITU TAGATA MA LE ITU ATUA
O LE AGAGA PAIA
AOAULI O LE SAPATI:
Faitauga mo le Suesuega o le vaiaso nei: Kenese 1:26;; 3:22; Isaia 6:8; Matt. 28:19; 1 Kor. 12:4-11, 28;
2 Kor. 13:14.
MATUA TAULOTO: “O lenei, ia outou o atu e fai nuu uma lava ma soo, ma papatiso atu ia te i latou
i le suafa o le Tama, ma le Atalii, ma le Agaga Paia.” Mataio 28:19.
E le mafai e se tasi ona faitau atili i le Tusi Paia e aunoa ma le fetaia’i o ia ma le Agaga Paia. E faapea le
faitauina o le Kenese 1:2, “Sa soona nunumi le lalolagi ma ua gaogao, sa ufitia foi le moana i le pouliuli; na
fegaoioiai foi le Agaga o le Atua i le fogātai.” Ae i le mutaaga o le Tusi Paia, e faapea le faitauina o le
Faaaliga 22:17, Ua fetalai mai le Agaga ma le faatoanofotane, Ina sau ia; ina fai atu foi ia o le faalogo, ina
sau ia; o le fia inu, ina sau ia, atoa ma le manao i ai, ina ave fua ia le vai o le ola.”
O le mea moni, i le va o nei mau e lua, ma itulau uma o le Tusi Paia, o loo faailoa mai ai ia i tatou le galuega
ma le misiona a le Agaga Paia. E sili lava ona moni i totonu o le Feagaiga Fou, o iinei o loo tuuina mai ai le
tele o vaaiga mautinoa, fuafuaga, ma le galuega a le Agaga Paia, ae maise lava le tulaga e faatatau i le
fuafuaga o le faaolataga.
O le vaiaso nei o le a taotasi atu ai la tatou suesuega i se tasi o vaega e masani ona le manino lelei o le
Agaga Paia: Lona itu Atua. I se isi faaupuga, o le Agaga Paia e le na o se malosi le faitino e puna mai le
Atua. Peitai, o Ia o le Atua, le tasi o le tolu o Peresona e aofia ai le aiga Atua o le faatuatuaga faakerisiano.
Se’i tatou vaai atu nei i lea aoaoga faavae o le Tusi Paia.
*Suesue le Lesona o le vaiaso nei e sauni ai mo le Sapati Aprila 1.
4.
---------------------------------------------------------------------------------------------------------------------------------
ULUA’I ASO MATI 26
O LE ATUA TOLUTASI
E faapea le faitauina o se vaega o lona lua o talitonuga e 27 o le Ekalesia Aso Fitu o le Toe Afio Mai: “E
tasi le Atua: le Tamā, le Alo, ma le Agaga Paia. o se sootaga e tasi o Peresona mai le vavau e toatolu.”
Seventh-day Believe…, p. 16. I se isi faaupuga, o tagata o le Toe Afio Mai faatasi ai ma le miliona ma
miliona o isi tagata Kerisiano – e talitonu i le itu tolutasi o le Atua; o lona uiga, e tasi lava le Atua(Teut.6:4) e
soifua o ni Peresona e toatolu. E ui ina faigata ona malamalama i lea manatu, ao faamaoniga mo lea upu
moni e matuā mamafa lava ma malosi. Ona e le mafai ona tatou malamalama a’ia’i i se mea, ae maise lava
se mea e faatatau i le natura o le Atua, e le a le mfai ona avea ma mafuaaga tatou te teena ai. (Iopu 11:7, 1
Kor. 13:12).
E faapefea i mau o loo i lalo ona faasino atu i le numera tele o le Aiga Atua
Ken. 1:26 ___________________________________________________
Kene. 3:22 __________________________________________________
Ken. 11:7 ___________________________________________________
Isa. 6:8 _____________________________________________________
Ioane 1:1-3 _________________________________________________
Ioane 8:58 __________________________________________________
Evagelia, pp. 614,615. “O le Tamā o le tumu atoatoa lea o le Aigaatua i le tino, ma e le mafai ona vaaia e
mata o tagata. O le Alo o le tumu atoatoa lea o le Aigaatua ua faaali mai. Ua faailoa mai e le Afioga a le
Atua o Ia “e matua tutusa lava ma Ia’… O le Fesoasoani na folafola atu e Keriso e auina mai pe a mavae
lona afio atu i le lagi, o le Agaga lea i lona tumu atoatoa o le Aigaatua, na te faailoa atu le mana o le alofa
faalelagi ia te i latou uma o e talia ma talitonu ia Keriso o se Faaola mo tagata taitoatasi. E tolu peresona
soifua o le tolutasi paia o le lagi; i le igoa o nei pule tetele e tolu – le Tama, le Alo, ma le Agaga Paia – e
papatisoina ai i latou e talia Keriso i le faatuatua ola, ma o nei pule o le a galulue faatasi ma tagata gaua’i o
le lagi i la latou taumafaiga e ola i le olaga fou ia Keriso.” Elena Uaita, Evagelia 614, 615
5.
----------------------------------------------------------------------------------------------------------------------------------------
ASO GAFUA MATI 27
LE ATUA LE AGAGA PAIA: VAEGA 1.
O le toatele o tagata e leai se faafitauli i le manatu o le Tamā o le Atua. O le mea moni, o le Atua o le Tama
lea. E oo foi i le manatu o Iesu o le Atua, le Atua atoatoa ua faailoa mai i le tino tagata, e ui lava ina faigata
ona malamalama i ai, ae mafai lava ona malamalama. O le mea moni, o le Atua mamana e ao ona mafai e Ia
ona faailoa mai o Ia i le tino tagata pe afai e finagalo iai, e moni ea?
Peitai, o le toatele o tagata, o le manatu o le Agaga Paia o ia lava o se Atua o se manatu e matua faigata
ona malamalama i ai. E faigofie atu ona manatu o le Agaga Paia e le o se Atua ae o se malosi le faitino, o se
mana ma se malosi faalelagi e pei o Kalave, e sau mai le Atua ma taape atu i le lalolagi.
Peitai, e manino lava le Tusi Paia o le Agaga Paia o le Atua; o lona uiga, o le Agaga Paia e pei lava o le
Tama, ma e pei foi o le Alo, o se tasi o Peresona o le Aigaatua.
E faapefea ona fesoasoani mai mau o loo i lalo ia i tatou e malamalama ai i le natura o le Agaga
Paia?
Ken. 1:2 ____________________________________________________
Mat. 1:20 ___________________________________________________
Mat. 28:19 __________________________________________________
Ioane 14:16 _________________________________________________
Galuega 5:3,4 _______________________________________________
Roma 8:11 __________________________________________________
1 Kor. 2:10,11 _______________________________________________
2 Kor. 3:17 _________________________________________________
O uiga o le amio a le Agaga Paia e aofia ai le upu moni(Ioane 16:13), le ola(Roma 8:2), ma le mana uma(1
Kor.2:10,11) – o uiga e fesootai atu i le Atua. Mataio 12:31,32 ua fetalai mai ai Iesu o upu leaga e fai atu ia
te Ia e mafai ona faamagaloina ae le mafai ona faamagaloina upu leaga e fai i le Agaga Paia, o se manatu e
leai sona uiga taua pe afai o le Agaga Paia o se mea e itiiti ifo nai lo le Atua. Mataio 1:20, na fanau mai Iesu
i le manava o Maria e ala i le Agaga Paia o se mau e faigata ona malamalama i ai pe afai o le Agaga Paia e
le o se Atua moni. (Vaai i le Kenese 1:2).
6.
----------------------------------------------------------------------------------------------------------------------------------------
ASO LUA MATI 28
LE ATUA LE AGAGA PAIA: VAEGA 2
“A ua fai atu Peteru, Anania e, se a le mea ua faatumu ai e Satani lou loto e te pepelo ai i le Agaga
Paia, ma e tuu ai ma oe nisi mea o le tau o le fanua? A o tumau e lei faatauina, e le o lou lava ea?
Ua uma foi ona faatauina, e lei i lau pule ea? Se a le mea ua tuu ai lenei mea i lou loto: ua e le
pepelo i tagata, a o le Atua.” (Galuega 5:3,4)
I nei fuaitau e lua o loo tasi ai le faaaogaina o le Atua ma le Agaga Paia. O le mea lea, o loo faatusa pauina
iinei e Peteru le Agaga Paia ma le Atua, o se mau malosi tele lenei e faasino atu i le itu Atua o le Agaga Paia.
Ua faapefea ona fesoasoani mai le 1 Korinito 12:4-11 ia i tatou e malamalama ai i le itu Atua o le
Agaga Paia?
___________________________________________________________
___________________________________________________________
O le 1 Korinito 12, faapea foi le mataupu 13, ma le 14, o loo tautala i mea alofa a le Atua po o meaalofa
faalelagi ua tuuina mai i tagata ekalesia. Ae sili ona taua, o le tautalaga a Paulo o loo faaaaoga ai le upu
lava lea e tasi na faaaogaina e Peteru i lana tautala atu ia Anania ma Safaira. O le Agaga i le 1 Korinito 12:
4-11, ma le Alii ma le Atua, i le fuaiupu e 5,6, ma le 28, o loo faaaogaina tutusa,
O le a le ta’u na ta’ua ai e Iesu le Sui na te auina ma i ona soo pe a mavae lona afio a’e i le lagi?
Ioane 14:16.
___________________________________________________________
___________________________________________________________
O iinei o loo tautala atu ai Iesu i Lona Tama o se la te tutusa ma ole atu mo le meaalofa mo ona soo. Aua o
le upu o loo faaliliuina iinei “le tasi”, o lona faa Eleni o le allos. O lona uiga, o le “tasi o le ituaiga e tasi.” E
ese mai i le heteros, o lona uiga “o le tasi o se isi ituaiga.” Na finagalo Iesu e auina mai se Tasi e pei o Ia, o
lona uiga, o le Atua – i lona au soo ma tupulaga fai mai o i latou e mulimuli ia te ia. Na ta’ua muamua e Iesu
lona va ma lona Tama. O le taimi nei ua ta’ua ai e Ia lonna va ma le Agaga Paia. O le mea lea, e tutusa i
latou uma, o Peresona Atua o le Aigaatua.
7.
---------------------------------------------------------------------------------------------------------------------------------------
ASO LULU MATI 29
O LE TASI O LE ATUA
“Ia ia te outou uma lava le alofa tunoa o le Alii o Iesu Keriso, ma le alofa o le Atua, atoa ma le
mafuta faatasi ma le Agaga Paia Amene.”(2 Kor. 13:14.
“O lenei, ia outou o atu e fai nuu uma lava ma soo, ma papatiso atu ia te i latou i le suafa o le
Tama, ma le Atalii, ma le Agaga Paia.” Mat. 28:19.
O faapefea ona fesoaosani mai o nei mau e lua ia i tatou e iloa atu le natura atua o le Agaga Paia?
___________________________________________________________
___________________________________________________________
E masani lava, ma o nisi foi taimi e molia ai tagata kerisiano o tagata e talitonu i atua e tele – tagata e tapua’
i i Atua e sili ai nai le tasi. O se moliga e mafai ona malamalama i ai peitai, e le tonu. I le avea ma tagata
kerisiano tatou te ioeina e toatolu peresona i le Aigaatua, peitai, “e tasi i latou i fuafuaga, i le finagalo, ma le
amio, ae le o le peresona.” Feau o Faamalologa, itulau 422. O le talitonuga faakerisiano e le o se
talitonuga i ni atua eseese se tolu; ae o le talitonuga i le Atua e toatasi ua faaali ma i peresona e tolu o loo
galulue a’ia’i faatasi o le tasi i le tasi.
O faapefea ona tuuina mai e Mose o le Atua i le Teuterenome 6:4?
___________________________________________________________
___________________________________________________________
“O lo tatou Atua” i le mau e mafai lava ona faaliliu tonu “o tatou Atua.” E ui lava i lo latou talitonuga i le Atua
e tasi, sa faaaoga pea e tagata Iutaia le igoa numera tele mo le Atua. I se isi faaupuga, o le Atua lenei e
“tasi” o loo faaataina mai i le nauna numera tele.
E tele lava fefinaua’iga a tagata aoaoina i seneturi e tele e faatatau i le uiga ma le taua o le upu numera tele
mo le Atua iinei ma isi foi nofoaga i totonu o le Tusi Paia… I le avea ma tagata talitonu i le natura tolutasi o
le Atua, e mafai ona tatou vaai i le faaaogaina lenei, o se faamaoniga vaaia o lo tatou talitonuga peitai, e le
o se faamaoniga maumaututu. E iai isi faaaliga faale Tusi Paia, e sili atu ona malosi, e faamaonia ai lo tatou
malamalamaaga i le natura o le Atua.
8.
-------------------------------------------------------------------------------------------------------------------------------
ASO TOFI MATI 30
FAAMAONIGA O LE ITU PERESONA O LE AGAGA PAIA
Ona o Iesu na afio mai i le lalolagi o se tagata, i foliga tagata, e lē faigata la ona manatu o Ia o se peresona
ma ona uiga mautinoa tau le amio. I se faatusatusaga, e tele taimi tatou te manatunatu ma faaaoga le upu
“it” e faatatau i le Agaga Paia, ua na o se malosi pe le faitino. Peitai, o loo faailoa ma i le Tusi Paia o le
Agaga Paia o se peresona ma’oti, se tasi e iai le poto(Ioane 14:26, 15:26, Roma 8:16), e iai lona finagalo
(Gal.16:7, 1 Kor. 12:11), ma le alofa(Efeso 4:30).
O loo tuuina atu foi e le Tusi Paia amioga a le Agaga Paia e iloa ai o Ia se peresona. O loo ta’ua mai o loo
ta’utino mai o Ia (1 Tim. 4:1), ma auina atu tagata i se galuega(Gal. 10:19, 20), ma taofia mai i le o atu i ni
nofoaga(Gal.16:7), faatonu atu tagata(Gal.11:12), faasa mea e fai(Gal.16:6), valaaulia le au faigaluega o le
tala lelei(Gal.13:2) tofia tagata i o latou tiute fai(Gal.20:28), ma fautua(Roma 8:26,27). O nei uiga ma
gaoioiga e tutusa ma amioga a tagata, e ese mai i lo le manatu o le Agaga Paia ua na o se malosi po o se
uiga tosina
Ua faapefea ona ta’ua e Iesu le Agaga? Ioane 15:26; 16:13,14. O le a le mea o loo fai mai ai nei
mau e faatatau i le galuega a le Agaga Paia?
___________________________________________________________
___________________________________________________________
E ui lava o le upu Agaga o se nauna le fai tino i le faaEleni, peitai o loo ta’ua o Ia e tusitala o le Tala Lelei i
le faaogaina o le upu o “Ia”. O loo ta’ua e le Agaga ia lava i le faaaogaina o le suinauna mo le peresona
muamua i le Galuega 13:2 – o a’u. O le mea lea, o se tulaga tatau ona faaaogaina o le upu “Ia” pe a tautala
e faatatau i le Agaga. O le nauna le faitino mo leAgaga, i le ulua’i gagana Eleni ma le Igilisi, e le masalomia o
le mafuaaga lea ua faaaogaina ai pea le upu (it) e fai ma faatusa o loo faaoga i le Tusi Paia e faailoa mai ai
lona natura ma gaoioiga – e pei o le afi, matagi, suauu, faamaufaailoga, atoa ma isi.
O le a sona uiga taua ia te oe o le Agaga Paia ua le na o se malosi faaleatua a o le Atua lava? O le
a se faamalosiaga i le iloa o le Atua o le Agaga Paia, o loo galue latalata ma i o tatou olaga, e ese
nai lo na o se malosi?
___________________________________________________________
9.
--------------------------------------------------------------------------------------------------------------------------------------
ASO FARAILE MATI 31
SUESUEGA FAAOPOOPO: Tusi a Elena Uaita – Evanglelism, itulau 615-617; Ellen White Comments, The
SDA Bible Commentary; vol. l,p. 209; vol. 6, pp. 1052,1053; Counsels to Parents, Teachers, and Students,
p. 530; Tetimonies for the Church, Vol. 4, pp. 585, 586.
“E manaomia ina ia tatou iloa o le Agaga Paia, o le peresona e pei lava o le Atua o le peresona, o loo
femaliua’i i luga o lenei fogaeleele..” Ellen G. White, Evangelism p. 616.
“O le Agaga Paia o le peresona fai tino, ana leai se manu e le mafai ona ia tuuina atu le molimau i o tatou
agaga o i tatou o le fanau a le Atua. E tatau foi ona avea o Ia ma peresona atua, ana leai se manu e le
mafai e ia ona suesueina mea lilo o loo natia i le finagalo o le Atua. Aua o ai le tagata na te iloa mea a se
tagata vagana le agaga o le tagata o loo i totonu ia te ia? E faapea foi ona le iloa e se tagata mea a le Atua,
vagana le Agaga o le Atua.” Elena Uaita, Evangelism p. 617.
“Ua na o le mana lava o le Atua i lona tolu o peresona o le Aiga Atua, le Agaga Paia, na te mafai ona taofia
le malosi o le alii o amioga leaga.” Itulau 617.
“E ao ona tatou galulue faatasi ma pule aupito silisili e tolu i le lagi – Le Tama, le Alo, ma le Agaga Paia, --
ma o nei pule(power) o le a galulue e ala atu ia i tatou, i le faia o i tatou o le aufaigaluega faatasi ma le
Atua.” Itulau 617.
FESILI MO FELAFOLAFOAIGA:
1. Faataga i latou i le vasega o e fia tautala atu i mea ua oo i o latou olaga e ala i le Agaga
Paia, ma le auala Na ia suia ai o latou olaga.
2. O le taumafai e malamalama i le mataupu e faatatau i le natura numera tele o le Atua e
toatasi e le faigofie i taimi uma. E iai tuaoi e gata mai ai le mea e mafai ona tatou malamalama i ai.
Aisea? E ao ai ona le tatau ona avea o ia tuaoi i lo tatou talitonuga i le aoaoga a le Tusi Paia e
faatatau i le natura o lo tatou Atua tolutasi? i se isi faaupuga, e ao ea ona tatou malamalama
atoatoa i se mea ina ia mafai ai ona tatou talitonu i ai? Taumafai e faamaonia lau tali.
10.
