LESONA 12 IUNI 10 - 16
O LE AGASALA E TETEE I LE
AGAGA PAIA
AOAULI O LE SAPATI:
FAitauga mo le Suesuega o le Vaiaso: Mataio 12:22-31, Mareko 3:22-30, 10:45, Luka 18:10-14,
Ioane 3:14-16, 1 Kor. 15:3, 1 Tim. 1:115, Epe. 2:9
MATUA TAULOTO: “E moni ou te fai atu ia te outou, E faamagaloina agasala uma a tagata, atoa
ma upu leaga uma latou te upu leaga ai; a o le upu leaga i le Agaga Paia, e le faamagaloina o ia,
a le tu a le tu lava; a e peitai e tatau ia te ia le sala e faavavau.” Mareko 3:28,29.
Mai upu faigata malolosi i totonu o le Tusi Paia, o le matua tauloto lenei o se tasi o upu silisili ona
faigata. I le manatunatu ia Iesu lava ia ma le mea na ia faia ina ia mafai ona faamagalo ai a tatou
agasala, o le manatu i se agasala e oo lava i le Sataruo e le mafai ona faamagaloina ai e ao ona
faagateteina ai i tatou. O le fasioti tagata, mataifale, faamaualuga, faitaaga, gaoi, ifo i tupua, e oo lava i
upu e fai e tetee atu ia Keriso(Mat. 12:21-32) e mafai ona faamagaloina(Efe.1:7); peitai, i le fetalaiga a
Keriso lava ia, “o le upuleaga e tetee atu i le Agaga Paia e le mafai ona faamagaloina.” E faigata tele
ona talitonuina!
O le mea lea, o le fesili fetaui lelei “o le a lea agasala e ‘le mafai ona faamagaloina.’ (O se fuaitau e le i
maua i le Tusi Paia)? O le manatu atoa i se agasala e le mafai ona faamagaloina e matua feteena’i lava i
mea uma ua tatou iloa e faatatau i le Atua o le na uia mea e tele ina ia mafai ona faamagalo a tatou
agasala uma. O le mea lea, o lenei mataupu e matua tatau ona suesueina – aua e manaomia e i tatou
uma ina ia iloa le mea e tasi e silisili atu i isi mea uma, ne’i oo ia i tatou le mea ua fetalai mai ai iesu, o le
faafanoga e faavavau” (f. 29).
Suesue le lesona o le vaiaso nei e sauni ai mo le Sapati Iuni 17.
81.
-----------------------------------------------------------------------------------------------------------------------------------
ULUA’I ASO IUNI 11
IA LAVEA’I TAGATA AGASALA
E TUSA AI ma le 1 Timoteo 1:15, o le a le autu o le afio mai o Keriso i le lalolagi nei?
___________________________________________________________
___________________________________________________________
E tele tusi e mafai ona tusia e faatatau i mafuaaga mo se tala ofoofogia ia Iesu Keriso, le Atua o le na
ufitia Lona itu Atua i le tino tagata ma maliu e sui a’i i tatou i le oti, e tatau ona oo ia i tatou tagata
agasala. O nisi o ia mafuaaga:
1. Na afio mai o ia ina ia faailoa ia i tatou po o ai le Atua? (Ioane 14:9).
2. Na afio mai o Ia ina ia avea ma Auauna a le Atua ma faailoa mai le
uiga o le avea ma auauna (Mat. 20:25-28, Fili. 2:5-7).
3. Na afio mai o ia e tuu mai ia i tatou se faaa’oa’o i le auala e soifua ai
(Ioane 2:6, 1 Pet. 2:21).
1. Na afio mai o ia ina ia avea ma Faitaulaga sili e faamaoni ma alofa mo i tatou (Epe. 2:17,17).
O nei mea uma lava, tusa lava pe o le a le taua, e matua leai lava sona uiga ia i tatou e aunoa ma lea e
le masalomia o se vaega silisli ona taua o le galuega a Keriso i le lalolagi.nei.
FAITAU le Mar. 10:45, Ioane 3:14-16, 1 Kor. 15:3, Epe. 2:9, ma le 1 Ioane 3:8. O a mafuaaga ua
tuuina mai faatasi e nei mau mo le soifua ma le maliu o Iesu?
___________________________________________________________
___________________________________________________________
Mai mafuaaga uma lava na afio mai ai Iesu ma maliu, o le mafuaaga silisili lava – mai la tatou vaai – na
maliu e lavea’i i tatou mai le faasalaga faale tulafono o le agasala, ole oti lea, le oti e faavavau. Ma o le
tala sili ona lelei ona e ala i lana galuega, e mafai e Ia ona faia o lea mea mo soo se tasi e talia o Ia. O le
lavea’iga e oo atu ia te i latou uma o e talitonu, e muamua le Iutaia atoa ma le Eleni(Roma 2:9), O i latou
o e talitonu e lavea’iina mai le faafanoga e faavavau” ( E tele vaega o loo lapata’i mai ai Iesu, e aofia ai le
Mareko 3:29), lea o loo ia fetalai ai e faatatau i le agasala e tasi e taitaiina atu ai i le faafanoga. O le mea
lea, afai e ala i le talitonu ia te Ia e laveaiina mai ai i tatou i lenei faasalaga e faavaau,” ma afai o le
agasala e le mafai ona faamagaloina e taitaiina atu ai i lenei faasalaga, O le a tonu lava la lenei agasala?
82.
------------------------------------------------------------------------------------------------------------------------------
ASO GAFUA IUNI 12
O AGASALA UMA LAVA MA UPU LEAGA
FAITAU le Mataio 12:22-31 ma taaofa’i le siosiomaga na fetalai ai Iesu i le mea na Ia faia. Matau
foi, po o ai na ia fetalai iai. E faapefea i lea mea ona fesoasoani ia i tatou e malamalama i le mea
na ia fetalai ai e faatatau i le agasala e le mafai ona faamagaloina?
___________________________________________________________
___________________________________________________________
___________________________________________________________
O fetalaiga malolosi nei a Iesu e le o se mea e te’i ua fai. Peitai, na faia e tali atu ai i se faamatalaga na
faia e se tasi o le au faresaio o lē e ui lava ina ia molimauina se faamalologa na faia e Iesu, ae na ia fai
atu, na ia “tutuli temoni” (Mat. 12:24) e ala ia Pelesepulo, le alii o temoni. O lenei uiga na faia i luma o ni
faamaoniga vaaia le mafai ona teena na tuuina atu ia te i latou i Lona mana faale Atua: lona soifuaga
paia, e mafai ona latou iloa ma sa latou ioeina mulimuli ane(Ioane 8:46; O Lona faamaloloina faavavega
o le ma’i(Mat.8:14-17, Mar. 1:29-34 etc.); Lona tutulieseina o temoni(Mat. (:32,33), ma Lona toe
faatutuina mai o e na oti(Luka 7:11-17).
Peitai, i le teena ma le le ioeina o le itu Atua o Keriso, ma matua tetee atu ia te Ia, na tuuina atu ai e ia
tagata i latou e faamalosi e faamatalaina Ana galuega i se isi mafuaaga nai lo le Atua, ma faapea, ona
tuuina atu ai ia Satani le gluega na faia e le Atua. O le mea lea, na latou tapuni ai o latou mafaufau i
gaoioiga vaaia o le Agaga Paia. E faaoo e le Agaga Paia upu moni i e mafaufau ma le loto (Ioaane 14:
17), 16:13) ma faailoa mai le agasala (Ioane 16:8). Peitai, e ui lava i le fapalepale ma le alofa o le Atua
ma lona le finagalo ina ia fano se tasi(2 Pet.3:9), o Lona Agaga e le galue e faavavau ma se loto ua
faamaaina(Ken.6:3). Afai e teena pea le upu moni, o le a le toe lagona loa le tuitui mai o le Agaga Paia,
ma lafoa’iina loa lea agaga i le pogisa matautia.
E ono mafai o le tulaga lea na tautala iai Paulo ina ua ia faamatalaina nisi loto ua “faamuina e le uamea
aasa” (1 Tim.4:2).O se tagata ua agasala i le agasala e tetee atu i le Agaga Paia, ua tapumi le avanoa ,
ma ua le toe iai se taulaga mo agasala, ae na o le faatali ma le mata’u i le faamasinoga” Epe. 10:26,27.)
Mai mea na e faitauina i lenei vaiaso, o le a lou malamalamaaga i le agasala e tetee atu i le
Agaga Paia?
83.
------------------------------------------------------------------------------------------------------------------------------
ASO LUA IUNI 13
LE AGASALA E LE MAFAI ONA FAAMAGALOINA
O le agasala o le mea e oti ai i lo tatou olaga, Peitai, e fiafia le Atua e faamagalo i tatou ia tatou agasala.
E le tatau ona faafanoina i tatou, e ui lava “ua agasala tagata uma lava, ma ua le oo i le viiga mai le Atua”
(Roma 3:23). Na maliu Iesu ina ia maua le aia e faamagalo ai tagata agasala salamo.
Peitai, e iai le agasala e tasi e le mafai ona faamagaloina ma e mautinoa lava e i’u atu i le oti e faavavau.
Pe afai e teena e se tasi e le fia tali atu i le agalelei o le Atua, lea ua faatulagaina e taitaiina atu ai i le
salamo (Roma. 2:4), o lenei teena pea e le fia talia le ofo o le alofa tunoa o le Atua o le a i’u atu ai
mulimuli ane i le faia o le agasala e le faamagaloina.
FAITAU le Mataio 12:31 ma le Mareko 3:29, i o latou siosiomaga faatulagaina. Ua faapefea ona
faailoa mai i lenei siosiomaga le mea o loo faamatalaina i le parakalafa o loo i luga?
O le agasala e le mafai ona faamagaloina, pe o le agasla e tetee atu i le Agaga Paia, o le teena faifaipea
lea o le malamalama, o le teena pea o le mea ua uma ona faia e Keriso mo i tatou. O lenei teena pea na
te faatauasoina mata faaleagaga ma faapogisaina le loto tetee i le olega a le Agaga, o se faataitaiga lelei
o taitai o Isaraelu. Mulimuli ane, o le a iai le pogisa mafiafia atoatoa i le agaga, ma malaia ai e faavavau
lea tagata aua ua ia faaumatia le lagona i lona agaga o le tuitui mai o le Agaga Paia.
O le tuuina o oe i le mea e le oo atu iai le mana o le Agaga Paia o le “agasala e le mafai ona
faamagaloina” aua e le mafai ona tatou salamo e aunoa ma le fesoasoani o le Agaga o le Atua. E le
mafai ona faia e le Atua se mea mo i tatou vagana ua ia faamalosia i tatou, a o lea mea e le faia e le Atua
mo i tatou. E mafai e i tatou i la tatou filifiliga saoloto ona tipieseina i tatou mai le faaolataga.
TOE FAITAU le Mataio 12:32, ma le Mareko 3:29; Matau lelei le auala ua notia ai e Iesu le agasala
e le mafai ona faamagaloina ma le manatu o le tautala. E tusa ai ma le faamaninoga o loo i luga,
aisea na te faia ai lea mea?
I aoaoga faale Tusi Paia, o upu e ta’u o amio. O upu o se vaega o le mea moni o loo latou faaataina mai.
Na fetalai atu le Atua, ona tu mai lea o le lalolagi (Ken. 1).O Iesu foi Ia o le “upu…ua liu tino tagata”
(Ioane 1:14). I le faaEperu. O le upu taatele mo le upu o le (dabar), o le isi ona uiga o “mea (thing)” “tala
tuufaasolo,” “valoaga,” e mafua lea ona o upu e fesoota’i atu i mea moni e faasino i ai. O le mea lea, ua
faatutusa e Iesu le tautala e tetee atu i le Agaga Paia o se teena faifaipea o le upu moni o loo taumafai le
Agaga e aumai ia i tatou. O upu ma amio fai e matua noa faatasi lava.
Manatunatu i se taimi talu ai na faamanu’aina ai oe e se tasi i upu. O lea mea e ao ona faaailoa
atu ai ia te oe o upu o mea “moni>” Osi nei sa oulua feagaiga ma le Atua e puipui ma le
faaeteete lou laulaufaiva.
84.
------------------------------------------------------------------------------------------------------------------------------------
ASO LULU IUNI 14
LAGONA FAAILOA MAI ELE AGAGA
“A maliu mai foi o ia (le Agaga) na te faailoa atu i le lalolagi le agasala, ma le amiotonu, ma le
faamasinoga: aua latou te le talitonu ia te a’u.” Ioane 16:8,9 RSV).
Ina ia agavaa i le avea ma se tasi e maua le faaolataga, e tatau i se alii po o se tamaitai ona iloa o ia o le
tagata agasala.E leai se tasi e ole atu mo se fesoasoani a le Faaola vagana ua ia lagona lona manaoga.
O se tasi o tatou manaoga aupito tele o le lagona lea e le tagata lava ia o le agasala. E le mafai ona
tatou faia lea lagona ia i tatou; o le galuega lea ua tuuina atu i le Agaga Paia e aumai ia i tatou le lagona
po o le iloa o le agasala. O lana ulua’i galuega lava o le faia lea o le tagata agasala ina ia iloa lona
tulaga agasala, po o lona tulaga leiloa. O le Agaga e le na’o se Fesoasoani. O lana mua’i galuega o le
faailoa o le agasala. E avea o ia o le Fesoasoani ia i latou ua uma ona maua le filemu ma le Atua e ala i
le ioeina ma le faaali atu o a latou agasala.
O le a se faamaninoga iloga o faaalia ai le mana o le Agaga e faailoa mai lagona o le agasala?
Luka 19:8,9.
Na faapefea ona faamaninoina e Iesu le mafai ona maua o le faaolataga mo le tagata agasala ua
salamo, a o le taimi lava foi lea e tasi o loo faailoa atu ai le leai o se faamoemoe o le tagata o
loo manatu o ia o loo amiotonu?
“E tatau ona malamalama ia i tatou lava, le malamalama e i’u atu i le salamo, a o lumanai ai ona mafai
ona maua e i tatou le faamagaloga ma le filemu. E le i lagona e le faresaio se lagona o le agasala. E le
mafai e le Agaga Paia ona galue ma ia. O lona agaga ua puipuia i totonu o le pusa u’amea o le fia
amiotonu e le mafai e u fanafana a le Atua e fana e le agelu ona ati i ai. Ua na o le tagata lava na te iloa
o ia o le tagata agasala e mafai ona lavea’i e Keriso.” Elena Uaita, Christs Objest Lessons, p. 158.
Pe a vaai le tagata i le faaaliga o le amiotonu ma le paia o le Atua, e pei ona vaai iai le perofeta o Isaia
(Isa.6:5,6), e faailoa atu e le Agaga i lea tagata o ia o le tagata agsala ma ua na o le faamasinoga a le
Atua ma le faaumataiga atoatoa o loo faatali mai mo ia vagana ua faasalavei e Iesu. O le mea lea, o le
mana faailoa mai o le Agaga Paia e matua taua tele i le taitaiina atu o i tatou ia Keriso. Manatunatu la, i
le tulaga leai se faamoemoe o tagata ua le lagona le una’iga a le Agaga e ala i le faamaaaina o i latou
lava i le musumusuga a le Agaga Paia
O a ni auala e lelei ai lagona agasala o se meafaigaluega e faaaogaina e le Atua? I le taimi lava lea e
tasi, o le a le tulaga e avea ai lagona agasala o se mea leaga, o se mea faigaluega e faaaoga e le
tiapolo. E mafai faapea ona tatou iloa le esesega?
85.
-------------------------------------------------------------------------------------------------------------------------------------
ASO TOFI IUNI 15
SALAMŌ MA LE AGASALA E LE MAFAI ONA FAAMAGALO- INA
O nisi taimi e iai tagata ekalesia o loo soifua i le olaga fefe ona ua manatu ua latou faia le agasala e le
mafai ona faamagaloina. I se isi itu, e le faigata ona tatou malamalama i ai pe aisea. O i tatou o tagata
agasala, afai e le pulea i taimi taitasi i lalo ifo o le taitaiga a le Agaga Paia, e mafai ona tatou faia soo se
mea lava. Ae mo le tagata ua ia iloa le Atua, ma maua se vaaaiga o le paia o le Atua, o ona lagona o le
agasala e mafai ona foliga mai o se vaaiga matautia ma le faasala. O le lagona o le agasala e mafai ona
avea o se avega mamafatu. O le toatele o tagata kerisiano i se vaega o la latou savalia ma le Alii, e iai
nai taimi e oo mai ai le mata’u, nai taimi e talitonu ai ua leai se faamoemoe ia i latou, latou te le mafai ona
fai, ma atonu ua latou faia le agasala e le mafai ona faamagalaoina.
Afai, o le “agasala e le mafai ona faamagaloina” o le teena pea lea o le Agaga Paia, Aisea e
avea ai se tasi ua mata’u ua ia faia lea agasala, o se tasi e matua manino lava na te le’i faia lea
agasala? Vaai i le Salamo 51:1-4, Luka 5:8, 18:13
___________________________________________________________
___________________________________________________________
O le faia o se amioleaga pe o se agasala e le o se pupuni tumau lea i le faaolataga. E mafai e Iesu ona
faaola soo se tasi lava e loto atu e talia le faaolataga. E le mamafa tele ia te ia lou taimi tuana’i pogisa.
Soo se agasala pe o se vaivaiga e mafai ona soloiesea e ala i lona toto na faamaligiina. E tasi lava le
tulaga e faalagolago iai lenei faamagaloga, o le salamo lea, ma ua na’o le galuega lava a le Agaga Paia
e maua ai lea mea. Tasi lava le mea ia tatou salamo, ona maua lea o le faamagaloga.
E tatau lava ona tatou manatua o le agasala e le o se mea e taalo iai. O agasala taitasi uma lava e
faamaaaina ai i tatou; o taimi uma tatou te pa’u ai, ua tatou faia lea mea aua ua tatou tulei ese le lagona
o le agasala. O le tele o taimi tatou te faia ai lea mea, o le faigofie foi lea ona toe fai ma saga fai pea.
Ma e ui lava ina mafai ona tatou salamo i taimi uma ma maua le faamagaloga, ae o le tele o lo tatou faia
o le agasala o le tele foi lea o lo tatou faamaaaina o tatou loto i le Peresona lava lea na te taitaina i tatou
i le salamo, o le Agaga Paia lea.
O le mea lea, e matua taua tele ia i tatou i aso taitasi ona tapā le malosi o le Atua e faamamaina i tatou,
faafouina i tatou, ma toe faia i tatou i le faatusa o le Faaola.
E iai se taimi e te lagona ai ua leai se faamoemoe ia te oe, o oe o le a malaia ui lava ina uma
ona e faia le filifiliga e mulimuli atu ia Keriso? O le a le mea na te aumaia lea lagona?
86.
-----------------------------------------------------------------------------------------------------------------------
ASO FARAILE IUNI 16
SUESUEGA FAAOPOOPO: Elena Uaita, Pateriaka ma Perofeta,pp. 621, 622; Faanaunauga o
Tupulaga, pp 321-324, 565-568; Galuega a le Au Aposetolo, pp 75,76; Aoaoga Autu a Keriso, “Tagata
Tapua’i e toalua,’ pp. 150-152.
“O le tagata na te teena le galuega a le Agaga Paia ua ia tuuina o ia lava i le nofoaga e le mafai ona oo
atu ai ia te ia le salamo ma le faatuatua.” Elena Uaita, Faanaunauga o Tupulaga, p. 322.
“O mafaufauga leaga uma lava e faaleagaina ai le agaga, faavaivaia lagona tau le amio, ma aga’i atu e
soloia musumusuga a le Agaga Paia.” Elena Uaita, Faanaunauga o Tupulaga, p. 302.
“Afai o le tagata, e ala i le teena pea o le taitaiga a le Agaga, ma ua aveesea ai le atamai e iloa ai le lelei
pe a vaai iai, afai o ona uiga tau le amio ua suia se’i oo ina avea mea leaga ia te ia o mea lelei ma amio
lelei ia te ia o mea leaga, e oo lava lina fetaia’i ma Iesu, na te le lagona se agasala , e le mafai e ia ona
salamo, ma o le mea lea, e le mafai ai ona faamagaloina o ia. O le agasla lea e tetee atu i le Agaga
Paia.” William Barclay, The Gospel of Mark (Philadelphia: The Westiminster Press, 1976, p. 81.
FESILI MO FELAFOLAFOAIGA:
1. I le avea o se tasi o le vasega, manatunatu ua lua fetaia’i ma se tagata ua matua
mautinoa e ia ua ia faia le agasala e le mafai ona faamagaloina. O le a se mea ua e aoaoina mai
le suesuega o le lesona o le vaiaso nei, e mafai ona e faaaogaina e fesoasoani atu ai i lea
tagata ina ia maua le faamoemoe ma le faamagaloga?
2. I le avea o se vasega, suesue i le Tusi Paia ma vaai po o a ni faataitaiga e mafai ona e
maua o i latou na foliga mai ua latou faia le agasala e le mafai ona faamagaloina. Tusi i lalo se
lisi o ia tagata ma talanoaina o latou tulaga taitasi.
3. Toe faitau le siitaga o i luma mai ia Barclay. O le a le auala o loo ia faamatalaina? Aisea e
matautia ai lea itu mo soo se tasi, e oo lava ia i latou o loo faailoa atu o i latou o tagata
kerisiano?
4. I le avea ma vasega, tatalo faatasi ina ia faafaigofie i tagata taitoatasi ona gaua’i atu i le
galuega a le Agaga Paia.
87.
