O AIGA
O aiga alolofa i le Atua e le mafai ona fa’aalia i se isi lava auala a o
le alolofa atu i isi. I le tali atu i le fesili a le a’oa’o tulafono fa’atatau i le
poloa’iga e sili, na fetalai Iesu: “Ia e alofa atu i le Ali’i lou Atua ma lou loto atoa ma lou agaga atoa
ma lou manatu atoa.” O le poloa’iga muamua lena ma le sili. E fa’apena fo’i lona lua, E te alofa atu
i le lua te tua’oi, ia pei o oe lava ia te oe” (Mataio 22:37-39).
Ua mautinoa lava e amana’ia e le Atua lo tatou va fealoa’i; a na leai, semanu e le fetalai mai o le
alofa i isi o le tulafono sili ona taua e tu i tafatafa i le alofa atu ia te Ia. E le o se mea na te’i ua
tupu le feso’ota’i e Iesu o poloa’iga nei e lua. O le alofa i le Atua e le mafai ona fa’aalia i se isi lava
auala e ese mai nai le alofa mo isi.
Na faia e le Atua tagata ta’ito’atasi e ese’ese ma e i ai o latou uiga fa’apitoa e ese mai ai ua mafua
ai ona iloa i latou. A e na ia faia fo’i i latou o ni tagata e fiafia e ulufale atu i le mafutaga ma isi. Ma
e leai lava se isi mea e sili atu ona taua ai la tatou mafutaga ma isi, ma sili atu ona a’afiaga i le
tino atoa ma le agaga, nai lo le aiga. O inei ua falute mai ai nei mau mea ia i tatou, e iloa ai le
malosi pe o le ma’i.
E ui lava ina ola fa’a-kerisiano i le aiga e taua, e mafai ona avea o se lu’iga, e faigata atu nai lo
nofoaga faitele, i le mea e faigofie ai ona ola fa’afoliga. O le aiga e masani lava ona matala ai le
mata pulepule. E sili atu ona faigofie ona fa’avalea isi tagata nai lo le fa’avalea o i latou o lo o tou
a’ai fa’atasi i le laulau e tasi, potu fa’atasi, moega e tasi i lea aso ma lea aso, ma lea tausaga ma
lea tausaga. Afai e mafai ona avea oe o se kerisiano i le aiga, e te mafaia fo’i ona avea ma
kerisiano i so o se mea.
O aiga e fetaui lelei lava i le fuafuaga a le Atua, o le ogatotonu lea e iloa ai e tagata ta’ito’atasi le
feuluuluta’i o le mafutaga ma isi ma sauni ai mo le mafutaga silisili- o le mafutaga lea ma le Atua. I
totonu o le aiga i tamaiti ma tagata matutua e mafai ona iloa ai le mafanafana e fa’amanatu mai ai
le Foafoa ma fa’amalosia ai i latou i le alofa fa’ale-‘au so’o. I le isi fo’i itu talu ai le alofa pepelo pe
o le manatu maulalo i ai, e mafai ai e tagata ona o ese ma o latou aiga ma o latou lagona oso vale
ma fa’afitauli fa’aleagaga ia e faigata ona soloi’esea.
E pei lava ona avea o tatou aiga o se nofoaga e sili ona taua ia faia ai mea silisili, e mafai fo’i ona
faia ai mea e silisili ona afaina ai. Letioa a tautala tele le Tusi Pa’ia fa’atatau i le olaga o le aiga.
Ona e fa’alagolago tele atu i ai.
O LE AIGA O LE ATUA
O aiga kerisiano o lo o fesaga’i ma se lu’i ia sa’ili e ola i le finagalo o le Atua i le olaga ma
mafutaga, e oo lava i tagata ta’ito’atasi o le aiga ua tatou maua lo latou le ausia o lea tapula’a
(Roma 3:23). O le mafua’aga lea, e muamua ai ma sili atu, o kerisiano moni e taofia i le fa’atuatua
le soifuaga le agasala o Keriso ma avea le ola lea e pei lava o sa latou mea totino, o le fa’avae e
mafai ai ona latou fausia le mafutaga ma le Atua e sili atu i la latou mafutaga ma o latou lava aiga
(Efe. 5:2).
O le ofoofogia o lo tatou fa’atuatua o le tala lelei, ona e silafia e le Atua mea uma ia i tatou. E tiga
alofa fa’atasi ma o tatou vaivaiga ma e tumu i le alofa ma le alofa fa’apalepale. O lo tatou iloa o le
mea lea fa’atatau ia te ia, e oo lava i lo tatou iloa lona alofa mo i tatou tusa lava pe tatou te leaga,
ua tatou faia fo’i fa’apea i isi, aemaise lava i latou o tatou lava aiga.
E ala i mafutaga a aiga ua finagalo ai le Atua ina ia fa’ailoa atu lona alofa i le lalolagi. O le avea
ma aiga ia a’oa’o ina ia ola fa’atasi e tusa ai ma le afioga a le Atua, o lona alofa tunoa e tafe atu i
olaga o i latou e pa’i i ai, ma tosina manumalo atu ai isi ia Iesu.
O le fa’aipoipoga ma le aiga, atoa ma le Sapati, o mea ia e lua na avatua i le fanau a tagata mai
Etena. E tutusa uma o galuega mai le a’ao o le Foafoa, e mausali le feso’ota’iga ma sa faia ina ia
aumai ai le vi’iga i le Atua ma fa’amanuiaga i le fanau a tagata. Na tutula’i i latou o e talitonu i le
foafoaga ina ia fa’aleoina atu le vala’au a le Fa’aaliga, ia ifo i lē na faia mea uma. (Fa’aa.14:7), O
le ekalesia Aso Fitu o lo o latou si’itia i luga le Sapati, ma fa’amanatu atu i le lalolagi le aso malolo
o le Foafoa. O le fa’aipoipoga ma le aiga, i o la’ua lava ala, o lo o ia toe ta’ua fo’i le foafoaga, ina
ua saunia e le Atua alofa mutimutivale le nofoaga mo le fanau a tagata e malolo ai. O le lagi lea o
lo o i ai le malosi o le alofa na tu’u fa’atasia ese’esega, i le mea o i ai le folafolaga o le folafolaga
ma le ta’utinoga i le uiga o le ta’utinoga. O le nofoaga lenei e malolo ai, o le lagi lenei, o le aiga.
E ui lava i lea, o le su’esu’ega o le kuata lenei ua uma ona tusia i se va’aiga fa’anoanoa i le to’
atele, ona e le o i ai le lagi e pei ona tatau ona i ai. O la tatou sini, pe afai e leai lava se isi mea, e
ala i le su’esu’eina o le Upu ina ia fesoasoani ai i aiga i le mea o le a avatu e le Atua mo i latou,
ina ia alolofa atili, ma sili atu ona mausali ia Keriso.
Ron Flowers, o le tusi tala o su’esu’ega o le kuata lenei, o lo o galue i le matagaluega ole
Galuega i Aiga i le Koneferenise a le au matutua sili talu mai le 1980. Na a’oa’o ma tusi i mataupu
i aiga i le tele o tausaga. O ia ma lona to’alua o Karen e to’alua la latou fanau matutua.